بوغدا

.
دونیایا گلمدن اونجه
بیر شعیریدیم
سونرا اولدوم اینسان
و اولنده ساده جه بیر سارالمیش بوغداییدیم
اولمامیشدان اونجه
بیر دیلک توتدو منی
سئوگی
ساریلدی آیاخلاریما
گئتممیش یوللار باشلادی منی
و چاخیرسیز کوزه لر هایکیردی سنسیز منی
اولمامیشدان اونجه نارباغیدی اورییم اورتاسیندا
اولومومه یاشادیم آلچاخ دوارلارین آلتیندا
اوچدوم
ایچیمدن
سیچیمه
هارایدان
سسیزلیگه
کوچدوم اوزومدن
بیلمدییم هارایلارا
ماهنی لارا
بیلمدییم دون یا لا را... شعیرلندیم
سئوگی گلدی سئودی سنی دوداغیمنان د و د ا غ ی نا
رونسانی سن یاراتدین شعیرلرین هوریونوده
سن اسندن
گیلاس باغی چیچکلندی
قورخو گلدی قولیبانی پالتاریندا سانجاخلادی سنسیزلیگی طالییمین قاش گوزینه
سنسیز منی
اولوم ایشدی گئجه گوندوز سنسیز منی سورگون سالدی گئجه لره
سندن اونجه تاریخی گیچمیش بایاتیدیم
سندن سونرا بوش اوبانین باغریندا تک ساری گلین ماهنیسیام بیر چوبانین یورقون آخشام نغمسینده
سن باتیسان
گیجه گلیر
من اولورم
بوغدالیخدا
سئوگی قالیر ابدیت داماغیندا
دامازلیغی سپلنیر شعیرلرین سوت دادینا اینسان اولور
شعیر قالیر
#مینا فرهمند
شعر تاریخی ۹۸ پاییزی